TET: “பாஸ் மார்க் குறையுமா?” தேர்வர்கள் வைக்கும் ‘நியாயமான’ வாதம்!

*TET: “பாஸ் மார்க் குறையுமா?” –* *தேர்வர்கள் வைக்கும் ‘நியாயமான’ வாதம்!*

TET: “Will the pass mark decrease?” A ‘reasonable’ argument put forward by candidates!

தமிழ்நாடு ஆசிரியர் தகுதித் தேர்வு (TET) எழுதிய லட்சக்கணக்கான தேர்வர்கள் ஆவலோடு எதிர்பார்த்த ‘ஆன்சர் கீ’ (Answer Key) வெளியாகியுள்ள நிலையில், மறுபுறம் “தேர்ச்சி மதிப்பெண்ணைக் குறைக்க வேண்டும்” என்ற கோரிக்கை மீண்டும் விஸ்வரூபம் எடுத்துள்ளது.

கடந்த நவம்பர் 15 மற்றும் 16 ஆகிய தேதிகளில் டெட் தாள்-1 மற்றும் தாள்-2 தேர்வுகள் மாநிலம் முழுவதும் நடைபெற்றன. சுமார் 3.75 லட்சம் பேர் எழுதிய இந்தத் தேர்வுக்கான தற்காலிக விடைக்குறிப்புகளை ஆசிரியர் தேர்வு வாரியம் (TRB) நேற்று வெளியிட்டது. டிசம்பர் 3-ம் தேதி வரை ஆட்சேபனைகளைத் தெரிவிக்கலாம் எனவும் அறிவிக்கப்பட்டுள்ளது.

*கொந்தளிக்கும் தேர்வர்கள்:*

வழக்கமாக ஆன்சர் கீ வந்தவுடன் கட்-ஆஃப் பற்றிய கணக்கீடுகள் தொடங்கும். ஆனால், இம்முறை தேர்வர்கள் மத்தியில் ஒருவித விரக்தியும், கோபமும் தென்படுகிறது. காரணம், தேர்ச்சி பெறுவதற்கு நிர்ணயிக்கப்பட்டுள்ள மதிப்பெண் வரம்பு.

தற்போதைய விதிகளின்படி, பொதுப் பிரிவினர் 90 மதிப்பெண்களும் (60%), இட ஒதுக்கீட்டுப் பிரிவினர் 82 மதிப்பெண்களும் (55%) பெற்றால் மட்டுமே தேர்ச்சி பெற்றதாக அறிவிக்கப்படும். ஆனால், வினாத்தாள்களின் கடினத்தன்மையைக் கருத்தில் கொண்டு, இந்த வரம்பை 50 சதவீதமாக, அதாவது 75 மதிப்பெண்களாகக் குறைக்க வேண்டும் என்று தமிழ்நாடு பட்டதாரி ஆசிரியர் கூட்டமைப்பு உள்ளிட்ட பல்வேறு சங்கங்கள் போர்க்கொடி தூக்கியுள்ளன. *பக்கத்து மாநிலங்களில் எப்படி?*

இதுகுறித்து நம்மிடம் பேசிய தேர்வர் ஒருவர், “ஆந்திரா, தெலுங்கானா போன்ற அண்டை மாநிலங்களில் டெட் தேர்ச்சி மதிப்பெண் 50 சதவீதமாக உள்ளது. இட ஒதுக்கீட்டுப் பிரிவினருக்கு அங்கு 40-45 சதவீதம் எடுத்தாலே பாஸ். ஆனால், தமிழகத்தில் மட்டும் ஏன் இந்த கெடுபிடி? இது வெறும் தகுதித் தேர்வுதானே தவிர, பணி நியமனத் தேர்வு அல்லவே?” என்று நியாயமான கேள்வியை முன்வைத்தார்.

*திமுக அரசின் நிலைப்பாடு என்ன?*

திமுக ஆட்சிக்கு வந்த பிறகு, பணி நியமனத்திற்குத் தனியாக நியமனத் தேர்வு (UGTRB) நடத்தப்படுகிறது. எனவே, தகுதித் தேர்வில் அதிகப்படியான வடிகட்டல் தேவையா என்பது கல்வியாளர்களின் வாதமாக உள்ளது. “தகுதித் தேர்வில் மதிப்பெண் தளர்வு அளிக்கப்பட்டால், இன்னும் பல்லாயிரக்கணக்கான பட்டதாரிகள் அடுத்தக்கட்ட நியமனத் தேர்வை எழுத வாய்ப்பு கிடைக்கும். இது சமூக நீதிக்கு வழிவகுக்கும்,” என்று ஆசிரியர் சங்கப் பிரதிநிதிகள் சுட்டிக்காட்டுகின்றனர்.

ஒருபக்கம் ஆன்சர் கீ செக் செய்யும் மும்முரம் இருந்தாலும், மறுபக்கம் பள்ளிக்கல்வித் துறை அமைச்சர் அன்பில் *மகேஷ் பொய்யாமொழி இதுகுறித்து என்ன முடிவெடுப்பார் என்ற எதிர்பார்ப்பு தேர்வர்கள் மத்தியில் ‘திக் திக்’ மனநிலையை உருவாக்கியுள்ளது"*.

*75 மதிப்பெண்கள் எடுத்தாலே ‘பாஸ்’ என்ற அறிவிப்பு வெளியாகுமா? பொறுத்திருந்து பார்ப்போம்.*