டிட்டோஜாக் 20 அம்சக் கோரிக்கைகள்: ஆகஸ்ட் 20-ல் BEO அலுவலகங்கள் முன் மாபெரும் கவனஈர்ப்பு ஆர்ப்பாட்டம்!

டிட்டோஜாக் 20 அம்சக் கோரிக்கைகள்: ஆகஸ்ட் 20-ல் தமிழகம் முழுவதும் BEO அலுவலகங்கள் முன் மாபெரும் கவனஈர்ப்பு ஆர்ப்பாட்டம்!

விழுப்புரம் / விக்கிரவாண்டி: தமிழ்நாடு தொடக்கக்கல்வி ஆசிரியர் இயக்கங்களின் கூட்டு நடவடிக்கைக்குழு (டிட்டோஜாக் - TITOJAC) சார்பில், ஆசிரியர்களின் நீண்ட நாள் கோரிக்கையான 20 அம்சக் கோரிக்கைகளை உடனடியாக நிறைவேற்றக் கோரி மாநிலம் தழுவிய அளவில் மாபெரும் கவனஈர்ப்பு கோரிக்கை முழக்க ஆர்ப்பாட்டம் நடைபெறவுள்ளது.
வருகின்ற 20.08.2026 (வியாழக்கிழமை) மாலை 5.00 மணியளவில் அனைத்து மாவட்டங்களிலும் உள்ள வட்டாரக் கல்வி அலுவலகங்கள் (BEO Office) முன்பாக இந்த போராட்டம் நடத்தப்பட உள்ளது.

விக்கிரவாண்டி ஒன்றியத்தில் எழுச்சிமிகு ஆர்ப்பாட்டம்

விழுப்புரம் மாவட்டம், விக்கிரவாண்டி ஒன்றிய டிட்டோஜாக் அமைப்பின் சார்பில் இந்த கவனஈர்ப்பு ஆர்ப்பாட்டம் மிக பிரம்மாண்டமான முறையில் ஏற்பாடு செய்யப்பட்டுள்ளது.
இப்போராட்டத்திற்கு டிட்டோஜாக் இணைப்புக் சங்கங்களின் வட்டாரத் தலைவர்கள் தலைமை தாங்கவுள்ளனர். வட்டார மகளிரணிச் செயலாளர்கள் முன்னிலை வகிக்க, மாநில மற்றும் மாவட்டப் பொறுப்பாளர்கள் போராட்ட விளக்கவுரை ஆற்றவுள்ளனர்.

"ஆற்றல்மிக்க ஆசிரியர் பேரினமே... நாம் வென்றெடுத்த கோரிக்கைகள் அனைத்தும் போராட்டங்கள் வாயிலாகப் பெற்றவையே! போராட்டங்கள் இல்லாமல் எந்தக் கோரிக்கையையும் வென்றெடுத்ததில்லை என்ற வரலாற்றினை மனதில் கொண்டு திரண்டு வாரீர்!" என டிட்டோஜாக் அழைப்பு விடுத்துள்ளது.

டிட்டோஜாக் முன்வைக்கும் 20 அம்ச முக்கியக் கோரிக்கைகள்:

தமிழக அரசு உடனடியாக தலையிட்டு தீர்க்க வேண்டும் என டிட்டோஜாக் வலியுறுத்தும் 20 அம்ச கோரிக்கைகளின் விவரம் பின்வருமாறு:

1. பழைய ஓய்வூதிய திட்டம் (OPS): பங்களிப்பு ஓய்வூதியத் திட்டத்தை (CPS) ரத்து செய்து, தேர்தல் வாக்குறுதிப்படி 6 லட்சத்திற்கும் மேற்பட்ட ஆசிரியர்களுக்கு பழைய ஓய்வூதியத் திட்டத்தை மீண்டும் அமல்படுத்த வேண்டும்.
2. நிதி ஒதுக்கீடு சீரமைப்பு: கல்வி மற்றும் ஓய்வூதியத்திற்கான நிதி ஒதுக்கீட்டைக் குறைப்பதைத் தவிர்த்து, TAPS திட்டத்திற்கான உரிய விதிமுறைகளை வெளியிட்டு பழைய ஓய்வூதியத்தை முழுமையாக நடைமுறைப்படுத்த வேண்டும்.
3. சம வேலைக்கு சம ஊதியம்: 01.01.2006 முதல் மத்திய அரசு ஆசிரியர்களுக்கு இணையான ஊதியத்தை இடைநிலை ஆசிரியர்களுக்கு வழங்கி, ஊதிய முரண்பாடுகளைக் களைய வேண்டும்.
4. சிறப்பு ஆசிரியர் தகுதித் தேர்வு எடையீடு மதிப்பெண்: சிறப்பு TET தாள் 1, 2 எழுதிய ஆசிரியர்களுக்கு பணிக்காலம் மற்றும் உயர்கல்வித் தகுதியின் அடிப்படையில் கூடுதல் வெயிட்டேஜ் மதிப்பெண்கள் வழங்க வேண்டும்.
5. சிறப்பு TET தேர்ச்சி மதிப்பெண்: சிறப்பு ஆசிரியர் தகுதித்தேர்வு எழுதிய ஆசிரியர்களுக்கு குறைந்தபட்ச தேர்ச்சி மதிப்பெண்ணை 40% என நிர்ணயம் செய்து அரசாணை வெளியிட வேண்டும்.
6. 1.76 லட்சம் ஆசிரியர்களுக்கு பணி பாதுகாப்பு: உச்சநீதிமன்றத் தீர்ப்பினால் பாதிக்கப்பட்டுள்ள 1,76,000 ஆசிரியர்களின் பணிப் பாதுகாப்பை உறுதி செய்ய கட்டாயக்கல்வி உரிமைச் சட்டத்தில் திருத்தம் செய்ய மத்திய அரசை வலியுறுத்தி தமிழக சட்டமன்றத்தில் தீர்மானம் நிறைவேற்ற வேண்டும்.

7. அரசாணை எண் 243 ரத்து: தொடக்கக்கல்வித்துறையில் 90% ஆசிரியர்களின் பதவி உயர்வு வாய்ப்பைப் பாதிக்கும் அரசாணை எண் 243-ஐ முற்றிலும் ரத்து செய்து, 60 ஆண்டுகால ஒன்றிய முன்னுரிமையை மீண்டும் நடைமுறைப்படுத்த வேண்டும்.
8. காவல்துறை வழக்குகள் ரத்து: 17.07.2025 மற்றும் 18.07.2025 ஆகிய தேதிகளில் அறவழியில் போராடிய ஆசிரியர்கள் மீது பதியப்பட்ட காவல் வழக்குகளை ரத்து செய்ய வேண்டும்.
9. தணிக்கைத் தடை நீக்கம்: அரசாணை எண் 23-ன் படி தொடக்க/நடுநிலைப்பள்ளி தலைமை ஆசிரியர்களுக்கு ஏற்பட்ட ஊதியத் தணிக்கைத் தடைகளை நீக்கி, நீதிமன்றத் தீர்ப்பினை விரைந்து நடைமுறைப்படுத்த வேண்டும்.
10. 7-வது ஊதியக்குழு Cell விரிவாக்கம்: Level-10 ஊதிய அடுக்கில் 25 ஆண்டுகளுக்கும் மேலாக பணியாற்றி உச்சவரம்பை அடைந்த இடைநிலை ஆசிரியர்களுக்கு கூடுதலாக 5 Cell நீடித்து ஆணை வழங்க வேண்டும்.
11. ஊக்க ஊதிய உயர்வு (Incentive Increment): பேரறிஞர் அண்ணா காலம் முதல் வழங்கப்பட்டு வந்த உயர்கல்விக்கான ஊக்க ஊதிய உயர்வை பழைய நடைமுறைப்படி மீண்டும் வழங்க வேண்டும்.
12. பி.எட் ஊக்க ஊதியத் தடை நீக்கம்: நடுநிலைப்பள்ளி தலைமை ஆசிரியர்களிடம் பி.எட் உயர்கல்வி ஊக்க ஊதியத்தை திரும்பச் செலுத்தச் சொல்லும் தணிக்கைத் தடையை உடனடியாக நீக்க வேண்டும்.
13. தொடக்கக்கல்வி இயக்குநரின் செயல்முறை ஆணை ரத்து: M.Com, B.Ed, M.A (பொருளாதாரம்) போன்ற பட்டங்களுக்கு வழங்கப்பட்ட ஊக்க ஊதிய உயர்வை ரத்து செய்த தொடக்கக்கல்வி இயக்குநரின் ஆணையினை ரத்து செய்ய வேண்டும்.
14. காலியிடங்களை நிரப்புதல்: தமிழகம் முழுவதும் காலியாக உள்ள அனைத்து ஆசிரியர் பணியிடங்களையும் காலமுறை ஊதியத்தில் உடனடியாக நிரப்ப வேண்டும்; TET தேர்ச்சி பெற்றவர்களுக்கு விரைந்து பணிநியமனம் வழங்க வேண்டும்.
15. அரசு உதவிபெறும் பள்ளி ஆசிரியர்களுக்கு நியமன ஒப்புதல்: பல ஆண்டுகளாக ஊதியமின்றி பணியாற்றி வரும் அரசு உதவிபெறும் பள்ளி ஆசிரியர்களுக்கு உடனடியாக நியமன ஒப்புதல் வழங்க வேண்டும்.

16. பகுதிநேர & சிறப்பு ஆசிரியர்கள் பணி நிரந்தரம்: பகுதிநேர மற்றும் சிறப்பு ஆசிரியர்களை பணி நியமன நாள் முதல் காலமுறை ஊதியத்தில் பணி நிரந்தரம் செய்ய வேண்டும்.
17. தொகுப்பூதிய பணிக்காலம் கணக்கீடு: 2004 முதல் 2006 வரை தொகுப்பூதியத்தில் பணியாற்றிய காலத்தை தேர்வுநிலை மற்றும் சிறப்புநிலைக்கு கணக்கில் கொள்ள வேண்டும்.
18. NHIS காப்பீட்டுத் திட்டம் சீரமைப்பு: ஆசிரியர்களுக்கான கட்டணமில்லா மருத்துவச் சிகிச்சையை முழுமையாக உறுதிசெய்து, புற்றுநோய், கண்புரை அறுவைசிகிச்சை, கர்ப்பப்பை நீக்கம் போன்ற நோய்களையும், முதிய பெற்றோர், விதவை மகள்கள் ஆகியோரையும் திட்டத்தில் சேர்க்க வேண்டும்.
19. இடஒதுக்கீடு உயர்வு: தொழிற்கல்வி இடஒதுக்கீட்டை 7.5%-லிருந்து 10%-ஆக உயர்த்த வேண்டும்; அரசு உதவிபெறும் பள்ளி மாணவர்களுக்கு தனியாக 3% இடஒதுக்கீடு வழங்க வேண்டும்.
20. ஆசிரியர் பாதுகாப்புச் சட்டம்: மருத்துவர்களைப் போல ஆசிரியர்களுக்கும் 'ஆசிரியர் பாதுகாப்புச் சட்டம்' இயற்றப்பட வேண்டும். கற்பித்தல் அல்லாத இதர பணிகளில் ஆசிரியர்களை ஈடுபடுத்துவதை முற்றிலும் தவிர்க்க வேண்டும். 55 வயதிற்கு மேற்பட்டவர்கள் மற்றும் அறுவை சிகிச்சை செய்துகொண்டவர்களுக்கு மக்கள் தொகை கணக்கெடுப்பு பணியிலிருந்து விலக்கு அளிக்க வேண்டும்.

ஆசிரியர்கள் பெருந்திரளாக பங்கேற்க அழைப்பு!

தங்கள் வாழ்வாதார உரிமைகளை மீட்கவும், 20 அம்சக் கோரிக்கைகளை அரசிடம் கொண்டு சேர்க்கவும் தொடக்கக்கல்வி ஆசிரியர்கள், இடைநிலை ஆசிரியர்கள், பட்டதாரி ஆசிரியர்கள் மற்றும் பகுதிநேர ஆசிரியர்கள் திரளாக வந்து ஆகஸ்ட் 20 மாலை 5 மணிக்கு நடைபெறும் BEO அலுவலக ஆர்ப்பாட்டத்தில் பங்கேற்குமாறு டிட்டோஜாக் விக்கிரவாண்டி ஒன்றிய நிர்வாகிகள் கேட்டுக்கொண்டுள்ளனர்.

இவன்:
இணைப்புச் சங்கங்களின் வட்டாரச் செயலாளர்கள்,
விக்கிரவாண்டி வட்டாரம் - விழுப்புரம் மாவட்டம்.