"ஆசிரியர்கள் ஏன் முன்கூட்டியே ஓய்வு பெற விரும்புகிறார்கள்?" - ஒரு உளவியல் கருத்து...

*"ஆசிரியர்கள் ஏன் முன்கூட்டியே ஓய்வு பெற விரும்புகிறார்கள்?"*

*___✍️ஆசான்....*

ஒரு உளவியல் கருத்து....

சமீபத்தில் ஒரு ஆசிரியர் என்னிடம் மிகவும் அமைதியாகக் கேட்டார்.

"60 வயது வரை வேலை செய்ய முடியும். ஆனால், மனம் 60 வரை தாங்குமா?"

இந்தக் கேள்வி இன்று பல ஆசிரியர்களின் உள்ளத்தில் இருக்கும் சுமையை வெளிப்படுத்துகிறது.

ஒரு காலத்தில் ஆசிரியர் பணி மிகவும் மதிப்புமிக்க சேவையாகக் கருதப்பட்டது. இன்று பல ஆசிரியர்கள், 55 வயதை எப்போது அடைவோம், எப்போது ஓய்வு பெறலாம் என்று எண்ணிக்கொண்டே பணியாற்றும் நிலைக்குத் தள்ளப்பட்டுள்ளனர்.

இதற்குக் காரணம் வேலை செய்ய விருப்பமின்மை அல்ல. தொடர்ச்சியான மன அழுத்தம், அதிகரித்து வரும் நிர்வாகப் பணிகள், சமூக அங்கீகாரக் குறைவு, மாணவர்களின் மாறிவரும் நடத்தைகள் மற்றும் பெற்றோரின் அளவுக்கு மீறிய தலையீடு ஆகியவை ஆசிரியர்களின் மனநலத்தை கடுமையாகப் பாதித்து வருகின்றன.

இன்றைய ஆசிரியர் பாடம் கற்பிப்பவர் மட்டுமல்ல. ஆலோசகர், வழிகாட்டி, பதிவேடு பராமரிப்பவர், நிகழ்ச்சி ஒருங்கிணைப்பாளர், பல நிர்வாகப் பொறுப்புகளை ஏற்றுக்கொள்ளும் நபர் என பல வேடங்களில் செயல்படுகிறார்.

இதற்கிடையில், பல பெற்றோர்கள் தங்கள் பிள்ளைகளின் ஒவ்வொரு பிரச்சினையிலும் ஆசிரியர்களை முழுமையாகக் குறை கூறும் மனப்பான்மையுடன் அணுகுவதும் அதிகரித்து வருகிறது.

சில நேரங்களில், பள்ளியிலோ, வெளியிலோ நடக்கும் ஒரு சில ஒழுக்க நடவடிக்கையே சமூக வலைத்தள விவாதமாகவோ அல்லது புகாராகவோ மாறுகிறது.....

ஆசிரியரின் கருத்தைக் கேட்பதற்கு முன்பே அவரை குற்றவாளியாகப் பார்க்கும் அணுகுமுறை, ஆசிரியர்களின் மனநம்பிக்கையை குறைக்கிறது. அதே நேரத்தில், வீட்டில் பின்பற்றப்பட வேண்டிய ஒழுக்கம், பொறுப்பு, மரியாதை போன்ற அடிப்படை மதிப்புகள் முழுமையாக பாடசாலையின் பொறுப்பாக மாற்றப்படுவதும் ஆசிரியர்களுக்கு கூடுதல் சுமையை ஏற்படுத்துகிறது.

ஒரு குழந்தையின் வளர்ச்சி என்பது ஆசிரியரின் பொறுப்பு மட்டுமல்ல; அது பெற்றோர், ஆசிரியர் மற்றும் சமூகத்தின் கூட்டுப் பொறுப்பாகும்.

இன்றைய குழந்தைகள் டிஜிட்டல் உலகம், சமூக ஊடகங்கள் மற்றும் வேகமாக மாறும் சமூக சூழலில் வளர்கின்றனர். எனவே அவர்களை வழிநடத்த ஆசிரியரும் பெற்றோரும் ஒரே அணியாக செயல்பட வேண்டும்.

பெற்றோர்கள் ஆசிரியர்களை எதிரியாக அல்ல, தங்கள் பிள்ளையின் வளர்ச்சிக்கான நண்பனாக பார்க்கும்போது மட்டுமே குழந்தைகள் பாதுகாப்பான மற்றும் ஆரோக்கியமான கல்விச் சூழலைப் பெற முடியும்.

ஆசிரியர்களுக்கு இன்று தேவையானது சம்பள உயர்வு மட்டும் அல்ல.

மரியாதை, நம்பிக்கை, ஒத்துழைப்பு, மனநல பாதுகாப்பு மற்றும் பெற்றோரின் சமநிலையான பங்களிப்பு.

ஒரு ஆசிரியரை மதிப்பது என்பது ஒரு மனிதரை மட்டுமல்ல; எதிர்கால தலைமுறையை உருவாக்கும் பணியை மதிப்பதாகும்.

*____✍️ஆசான்...*