பலியாடாக்கப்படும் ஆசிரியர்கள்: இது நிர்வாகச் சீர்கேடா அல்லது அதிகார வன்முறையா?

பலியாடாக்கப்படும் ஆசிரியர்கள்: இது நிர்வாகச் சீர்கேடா அல்லது அதிகார வன்முறையா? - பெரம்பலூர் சம்பவம் எழுப்பும் கேள்விகள்!

பெரம்பலூர் தேனூர் பள்ளியில் ஆசிரியரை முட்டி போட வைத்த சம்பவம் ஒட்டுமொத்தக் கல்விச் சமூகத்தின் சுயமரியாதையையே கேள்விக்குறியாக்கியுள்ளது. ஆசிரியர்களுக்குப் பாதுகாப்பு மற்றும் குற்றவாளி மீது கடும் குற்றவியல் நடவடிக்கை கோரி எழும் வலுவான குரல்!

சமூகத்தை உருவாக்கும் சிற்பிகள் என்று மேடைகளில் புகழப்படும் ஆசிரியர்கள், களத்தில் அதிகார வர்க்கத்தாலும் நிர்வாக அமைப்பாலும் எந்த அளவுக்குக் கேவலப்படுத்தப்படுகிறார்கள் என்பதற்குப் பெரம்பலூர் தேனூர் மேல்நிலைப் பள்ளிச் சம்பவமே சாட்சியாக அமைந்துள்ளது.

வகுப்பறையில் ஆபாச வாசகங்கள் எழுதிய மாணவர்களை ஒழுங்குபடுத்த முயன்ற முதுகலை ஆசிரியரை, ஒரு பஞ்சாயத்துச் செயலாளர் பள்ளிக்குள் புகுந்து மிரட்டி மாணவர்களுக்கு முன்பாகவே முட்டி போட வைத்திருப்பது ஒட்டுமொத்தக் கல்விச் சமூகத்தின் முகத்திலேயும் அறைந்த அவமானமாகும்.

மற்ற அரசுத் துறைகளில் தவறு நடக்கும் போது கீழ்நிலை ஊழியர்களைக் காப்பாற்ற ஒட்டுமொத்த நிர்வாகமும் கவசமாக நிற்கும் போது, பள்ளிக் கல்வித்துறையில் மட்டும் ஆசிரியர் மீது கை வைக்க யார் வேண்டுமானாலும் வரலாம் என்ற அவல நிலை ஏன் உருவானது?

1. அதிகாரிகளின் மெத்தனமும் பழிவாங்கும் போக்கும்:

எந்தத் துறையிலாவது தார்ச்சாலை உடைந்ததற்கோ, பாலம் விரிசல் விட்டதற்கோ பொறியாளர் உடனே சஸ்பெண்ட் ஆகிறாரா? காவல் துறையில் குற்றங்கள் தடுக்கத் தவறினால் உடனடியாக பணிநீக்கம் நடக்கிறதா?

ஆனால், பள்ளியில் மாணவன் ஒழுங்கீனமாக நடந்தாலும் ஆசிரியர் மீது மெமோ; மாணவனைக் கண்டித்தாலும் சஸ்பெண்ட். ஆசிரியர் சமூகத்தைப் பாதுகாக்க வேண்டிய கல்வித்துறை அதிகாரிகளே, சமூக வலைதளப் பரபரப்புக்கும் அரசியல் அழுத்தங்களுக்கும் பயந்து ஆசிரியர்களை உடனடியாக பலியாடாக்குவது வாடிக்கையாகிவிட்டது.

2. பறிக்கப்பட்ட ஒழுங்கு நடவடிக்கைகளும், கட்டப்பட்ட கைகளும்:

"மாணவர்களைக் கண்டிக்கக் கூடாது, தட்டிக் கேட்கக் கூடாது" என்று விதிகளை வகுத்துவிட்டு, வகுப்பறையில் ஆபாசப் படங்கள் வரையும் ஒழுங்கீனத்தைச் சகித்துக் கொள்ள வேண்டும் என எதிர்பார்ப்பது என்ன வகையான நீதி?

ஆதிக்க மனோபாவத்துடன் ஒரு உள்ளாட்சிப் பணியாளர் தலைமை ஆசிரியர் அறைக்கும் வகுப்பறைக்கும் வந்து தாதா போல் மிரட்டி ஆசிரியரை முட்டி போட வைக்கிறார் என்றால், அரசுப் பள்ளிகளில் ஆசிரியர்களின் உயிருக்கும் சுயமரியாதைக்கும் என்ன பாதுகாப்பு இருக்கிறது?

3. சுயமரியாதையை இழந்து எதற்கு இந்தப் பணி?

எந்நேரமும் தலைக்கு மேல் தொங்கும் மெமோ கத்திகள், ஆப் (App) பதிவுகள், கற்பித்தல் சாராத சுமை, போதாதற்கு மாணவர்களாலும் பெற்றோர்களாலும் அதிகார வர்க்கத்தாலும் இழைக்கப்படும் அநீதிகள். சுயமரியாதையை அடகு வைத்துவிட்டு வகுப்பறையில் நிற்கும் ஆசிரியரால் எப்படி ஒரு தலைமுறையை நிமிர்ந்து நிற்கக் கற்றுக்கொடுக்க முடியும்?

அரசு செய்ய வேண்டிய அத்தியாவசிய நடவடிக்கைகள்:

ஆசிரியரை முட்டி போட வைத்த அந்த பஞ்சாயத்துச் செயலாளர் மீது உடனடியாக அரசு ஊழியர் பணித் தடுப்பு, அத்துமீறல் மற்றும் மிரட்டல் சட்டப் பிரிவுகளின் கீழ் கடும் குற்றவியல் நடவடிக்கை எடுக்க வேண்டும்.