TN Budget 2026: பள்ளிக்கல்வித் துறை நிதி குறைப்பா? ஆசிரியர்களுக்கு ஏமாற்றமா? த.வெ.க அரசுக்கு ஆசிரியர் கூட்டணி முன்வைக்கும் முக்கியக் கோரிக்கைகள்!

TN Budget 2026: பள்ளிக்கல்வித் துறை நிதி குறைப்பா? ஆசிரியர்களுக்கு ஏமாற்றமா? த.வெ.க அரசுக்கு ஆசிரியர் கூட்டணி முன்வைக்கும் முக்கியக் கோரிக்கைகள்!

தமிழ்நாடு பட்ஜெட் 2026-2027: பள்ளிக்கல்வித் துறை நிதி ஒதுக்கீடு மற்றும் ஆசிரியர்களின் எதிர்பார்ப்புகள் - ஒரு விரிவான பார்வை!

தமிழ்நாட்டில் புதிதாகப் பொறுப்பேற்றுள்ள த.வெ.க அரசின் 2026-2027 ஆம் ஆண்டுக்கான திருத்தியமைக்கப்பட்ட நிதிநிலை அறிக்கையை (Revised Budget) மாண்புமிகு நிதியமைச்சர் மரிய வில்சன் அவர்கள் 05.08.2026 அன்று சட்டமன்றத்தில் தாக்கல் செய்தார்.
கடந்த தி.மு.க ஆட்சியில் தாக்கல் செய்யப்பட்ட இடைக்கால நிதிநிலை அறிக்கையைத் தொடர்ந்து, தற்போதைய புதிய அரசு தாக்கல் செய்துள்ள இந்த முதல் பட்ஜெட்டில் பள்ளிக்கல்வி நலன் சார்ந்த பல்வேறு புதிய அறிவிப்புகள் இடம்பெற்றுள்ளன.
இருப்பினும், தொடக்கக்கல்வி ஆசிரியர்களின் நீண்டகாலக் கோரிக்கைகள் குறித்து எவ்வித அறிவிப்பும் இல்லாதது ஆசிரியர் சமூகத்தினர் மத்தியில் ஏமாற்றத்தை ஏற்படுத்தியுள்ளது.

பள்ளிக்கல்வித் துறைக்கான முக்கிய நிதி ஒதுக்கீடுகள் & திட்டங்கள்:

• சூப்பர் கிளீன் & சூப்பர் கேம்பஸ் திட்டம்: 10,000 அரசுப் பள்ளிகளில் இத்திட்டத்தைச் செயல்படுத்த ரூ.139 கோடி ஒதுக்கீடு.
• பெருந்தலைவர் காமராஜர் சிறப்புப் பள்ளிகள்: நவீன வசதிகளுடன் கூடிய சிறப்புப் பள்ளிகளை அமைக்க ரூ.125 கோடி ஒதுக்கீடு.
• பள்ளிகள் நவீனமயமாக்கல்: 3,734 அரசுப் பள்ளிகளின் உட்கட்டமைப்பை மேம்படுத்த ரூ.2,132 கோடி நிதி.
• சுத்திகரிக்கப்பட்ட குடிநீர் & பாதுகாப்பு: பள்ளிகளில் தினசரி தூய்மைப் பணிகள், குடிநீர், கழிப்பறைப் பராமரிப்பு மற்றும் 24 மணி நேர பாதுகாப்புத் திட்டம்.
• போதைப்பொருள் ஒழிப்பு: பள்ள வளாகங்களில் போதைப்பொருள் ஒழிப்பு விழிப்புணர்வுத் திட்டங்கள்.

பெருந்தலைவர் காமராஜர் காலை உணவுத் திட்டம் விரிவாக்கம்:

அரசு மற்றும் அரசு உதவிபெறும் பள்ளிகளில் 6 முதல் 8 ஆம் வகுப்பு வரை பயிலும் மாணவர்களுக்குக் காலை உணவு வழங்கும் திட்டத்தை த.வெ.க அரசு அறிவித்துள்ளது வரவேற்பைப் பெற்றுள்ளது.
ப பகுத்தறிவுப் பகலவன் தந்தை பெரியார் பிறந்த தினமான 17.09.2026 முதல் இத்திட்டம் நடைமுறைக்கு வரவுள்ளது.
கல்விக் கண் திறந்த பெருந்தலைவர் காமராஜர் அவர்களின் பெயரை இத்திட்டத்திற்குச் சூட்டியிருப்பது மிகவும் பொருத்தமான ஒன்றாகும்.

நிதி ஒதுக்கீடு குறைப்பு: ஆசிரியர்கள் மற்றும் கல்வியாளர்களின் கவலை!

2025-2026 நிதிநிலை அறிக்கையில் பள்ளிக்கல்வித்துறைக்கு ரூ.46,767 கோடி ஒதுக்கப்பட்டிருந்த நிலையில், 2026-2027 நிதிநிலை அறிக்கையில் ரூ.44,527 கோடி மட்டுமே ஒதுக்கீடு செய்யப்பட்டுள்ளது.
இதன் மூலம் கடந்த ஆண்டை விட ரூ.2,240 கோடி நிதி குறைந்துள்ளது கல்வியாளர்கள் மற்றும் ஆசிரியர் சங்கங்கள் மத்தியில் அதிர்ச்சியை ஏற்படுத்தியுள்ளது.
கல்வி மற்றும் சுகாதாரம் போன்ற அத்தியாவசியச் சேவைத் துறைகளுக்குச் செலவிடப்படும் நிதியை வெறுமனே செலவாகப் பார்க்காமல், நாட்டின் எதிர்காலத்திற்கான முதலீடாகப் பார்த்து கூடுதல் நிதி ஒதுக்கீடு செய்ய வேண்டும் என்பதே அனைவரின் எதிர்பார்ப்பாகும்.

நிறைவேறாத ஆசிரியர்களின் 8 முக்கியக் கோரிக்கைகள்:

கடந்த 28.07.2026 அன்று மாண்புமிகு பள்ளிக்கல்வித் துறை அமைச்சர் அவர்களுடன் நடைபெற்ற கலந்துரையாடலில் டிட்டோஜாக் (DITOJAC) பேரமைப்பு சார்பில் முன்வைக்கப்பட்ட பல முக்கியக் கோரிக்கைகள் இந்த நிதிநிலை அறிக்கையில் இடம்பெறவில்லை.
குறிப்பாக, கீழ்க்கண்ட கோரிக்கைகள் குறித்து உடனடித் தீர்வு தேவைப்படுகிறது:

1. பழைய ஓய்வூதியத் திட்டம் (CPS ரத்து): பங்களிப்பு ஓய்வூதியத் திட்டத்தைக் கைவிட்டு பழைய ஓய்வூதியத் திட்டத்தை மீண்டும் நடைமுறைப்படுத்துதல்.
2. இடைநிலை ஆசிரியர் ஊதிய முரண்பாடு: சமவேலைக்குச் சமஊதியம் கோரி போராடி வரும் இடைநிலை ஆசிரியர்களின் ஊதிய இழப்பைச் சரிசெய்தல்.
3. ஆசிரியர் தகுதித் தேர்வு (TET) விலக்கு: ஏற்கனவே பணியில் உள்ள ஆசிரியர்களுக்கு TET தேர்வில் இருந்து முழு விலக்கு அளித்தல்.
4. சிறப்பு TET மதிப்பெண் சலுகை: சிறப்பு ஆசிரியர் தகுதித் தேர்வில் தேர்ச்சி மதிப்பெண்களைக் குறைத்து Weightage மதிப்பெண்கள் வழங்குதல்.
5. அரசாணை 243 ரத்து: தொடக்கக் கல்வித்துறையைப் பாதிக்கும் அரசாணை 243-ஐ முற்றிலுமாகத் திரும்பப் பெறுதல்.
6. காலியிடங்கள் நிரப்புதல்: கடந்த 12 ஆண்டுகளாக நிரப்பப்படாமல் உள்ள 15,000-க்கும் மேற்பட்ட ஆசிரியர் காலியிடங்களை உடனடியாக நிரப்புதல்.
7. ஊக்க ஊதிய உயர்வு: ஆசிரியர்களின் உயர்கல்விக்கான ஊக்க ஊதிய உயர்வை மீண்டும் வழங்குதல்.
8. தணிக்கைத் தடைகள் நீக்கம்: தொடக்கக்கல்வி ஆசிரியர்கள் மீதான தவறான தணிக்கைத் தடைகளை ரத்து செய்தல்.

ஆசிரியர் கூட்டணியின் வேண்டுகோள்:

"பட்ஜெட் கூட்டத்தொடரில் நடைபெறவிருக்கும் பள்ளிக்கல்வித் துறை மானியக் கோரிக்கையின் போது, மாண்புமிகு பள்ளிக்கல்வித் துறை அமைச்சர் அவர்களும், மாண்புமிகு முதலமைச்சர் அவர்களும் சட்டப்பேரவை விதி 110-ன் கீழ் ஆசிரியர்களின் இந்த நியாயமான கோரிக்கைகள் குறித்த சாதகமான அறிவிப்புகளை வெளியிட வேண்டும்" என தமிழ்நாடு ஆரம்பப்பள்ளி ஆசிரியர் கூட்டணியின் பொதுச்செயலாளர் ச.மயில் அவர்கள் கேட்டுக்கொண்டுள்ளார்.